دو روز می‌شود که ده‌ها جوان در ولایت غور به دلیل بی‌توجهی دولت نسبت به این ولایت، به خیابان‌ها می‌آید و دست به اعتراض می‌زنند و دولت را به  کم‌کاری نسبت به ولایت غور متهم می‌نمایند.

اما امروز در هرات هم شماری از جوانان، دانشجویان و فعالان مدنی ولایت غور مقیم ولایت هرات، حکومت را تبعیض متهم کردند؛ فضل‌الدین مذهبی رئیس جوانان ولایت غور مقیم هرات می‌گوید؛ حکومت وحدت ملی نسبت به حکومت پشین یا حکومت کرزی، این ولایت  را بیشتر به‌سوی محرومیت سوق داده است.

وی می‌گوید «ولایت غور مدت هفده سال می‌شود که از محروم‌ترین ولایات افغانستان محسوب می‌شود، بارها مردم غور صدای خویش را بلند کردند، اما گوش شنوا وجود نداشت و شنیده نشد، ما نسبت به حکومت وحدت ملی امیدوار بودیم که نسبت به حکومت قبلی بیشتر به ولایت غور توجه می‌کند، اما متأسفانه ما را محروم‌تر نگهداشت».

برق، سرک و آب آشامیدنی سه خواسته اصلی شهروندان ولایت غور از حکومت مرکزی هستند، جوانان این شورا می‌گویند اگر دولت به خواسته‌‌های آنان توجه نکند، دست به اعتراض‌های گسترده‌‌ای خواهند زد.

ضیا‌الحق مبین فعال مدنی در غور با شکایت از محروم نگهداشتن غور از سوی حکومت، می‌گوید در چندین سال گذشته هیچ کار بنیادی برای این ولایت صورت نگرفته است و با وجود سرازیر شدن میلیون‌ها دالر به افغانسان، سهم شهروندان ولایت غور هیچ بوده و از تمام سهولت‌های زندگی محروم نگهداشته شده است.

عبدالکریم اطمینان یک‌تن از شهروندان غور می‌گوید؛ باشندگان غور منتظر بودند تا در بودجه سال ۱۳۹۷، حداقل مقدار پولی برای بازسازی برخی از نقاط ضروری این ولایت در نظر گرفته شود، اما با عدم اختصاص بودجه از سوی دولت، باشندگان این ولایت نا امید شدند.

شکایت‌ها از عدم توجه حکومت نسبت به برخی از ولایات، حرفی تازه‌ای نیست، این دفعه اول نیست که باشندگان غور به دلیل
آن‌چه محرومیت می‌خوانند، دست به اعتراض می‌زنند، این اعتراض‌ها در حالی‌ست که حکومت وحدت ملی همواره از انکشاف متوازن در سراسر کشور سخن گفته اند.