افغانستان و تاجیکستان پنج تفاهم‌نامه‌ی همکاری را در بخش‌های مختلف امضا کرده‌انداین تفاهم‌نامه‌ها در جریان سفر رییس‌جمهور اشرف غنی به تاجیکستان امضا شده است.

آقای غنی و امام‌علی رحمان، رییس‌جمهور تاجیکستان در هنگام امضای این تفاهم‌نامه‌ها حضور داشته‌اند.

در خبرنامه‌ی ارگ ریاست‌جمهوری آمده است که این تفاهم‌نامه‌ها در بخش‌های سیاسی، امنیتی، تجارتی، ترانزیتی، ترانسپورتی، انرژی و فرهنگی امضا شده است.

در خبرنامه همچنان گفته شده است که رییسان‌جمهور دو کشور اعلامیه‌ی مشترک نشست دوجانبه افغانستان و تاجیکستان را نیز امضا کرده‌اند.

رییس‌جمهور غنی صبح دیروز در رأس یک هیأت بلندرتبه‌ی دولتی در یک سفر رسمی دو روزه به تاجیکستان رفت.

هدف از سفر آقای غنی شرکت و سخنرانی در نهمین نشست وزیران خارجه‌ی قلب آسیا – روند استانبول، گفته شده است.

این نشست قرار است امروز با حضور وزیران خارجه‌ی ۱۴ کشور و رییسان‌جمهور افغانستان و تاجیکستان برگزار شود.

تقویت اجماع منطقه‌ای در مورد صلح افغانستان، توسعه‌ی همکاری‌های سیاسی، امنیتی و اقتصادی میان کشورهای منطقه از موضوعات اصلی بحث در این نشست خواهد بود.